Mbi 100 mijë makina hyjnë pothuaj çdo ditë në Prishtinë. Rreth 80 mijë të tjera janë makina të vetë prishtinasve. Rrjedhimisht, në një ditë të zakonshme, pothuaj 200 mijë makina ndodhen brenda kryeqendrës. Për pasojë, në kohë të pikut dhe në disa fyte të ngushta, trafiku rëndohet shumë. Vetëm në nyjën e rrugëve “Agim Ramadani”, “Haxhi Zeka” dhe “Ibrahim Lutifu”, përskaj Xhamisë së Çarshisë, në një ditë të zakonshme kalojnë rreth 30 mijë makina. Në kohët e pikut, nëpër këtë nyjë kalojnë mbi 12 mijë makina. Pra, 40 për qind e trafikut ditor. Këto shifra janë të mjaftueshme për të vënë në pah rëndësinë e zgjidhjes së problematikës së trafikut në këtë zonë. Sipas Planit të Mobilitetit të Qëndrueshëm Urban (PMQU), zhvillimi i një sistemi të integruar të transportit publik, që synon përmirësimin e qasjes në të gjithë qytetin dhe përmirësimin e lidhjes ndërmjet vendbanimeve të tjera urbane në partneritet me ofruesit e transportit publik, është zgjidhja e këtij problemi. Projekti parasheh ndërtimin e nënkalimit ku do të bëhet zgjerimi i sheshit deri te Sahatkulla, si dhe do të bëhet lidhja me sheshin ekzistues të njohur si Trekëndëshi. Ndërsa, automjetet do të qarkullojnë nën të.

Ky kompleks multifunksional do të shërbejë si zemra e aktiviteteve, me një stadium futbolli që pritet të bëhet një ndër kryeveprat arkitekturore të qytetit, duke ofruar 25 mijë ulëse dhe dy fusha stërvitore. Shtojmë këtu edhe kompleksin e pishinave olimpike me një pishinë të brendshme dhe dy të jashtme, të dizajnuara për të përmbushur kriteret më të larta ndërkombëtare për sporte ujore, duke u bërë një prej ambienteve kryesore për garat gjatë lojërave. Në këtë kompleks do të vendosen edhe infrastruktura për sporte të tjera të rëndësishme që mungonin më parë, si një kompleks i dedikuar për tenisin me një fushë qendrore dhe gjashtë fusha të tjera, si dhe qendra për sportet me dorë dhe ato luftarake, secila me kapacitet për 3 mijë e 500 shikues. Ky projekt parashikon gjithashtu hapësira për atletikën, çiklizmin dhe basketbollin 3×3 në fusha të hapura me kapacitet deri në 5 mijë ulëse. Përfshirja e hapësirave administrative për federatat dhe Komitetin Olimpik të Kosovës, një parking dykatësh nën tokë, stacioni i autobusëve, qendra tregtare, hoteli dhe qendra e konferencave do të sigurojnë një infrastrukturëm, jo vetëm për Lojërat Mesdhetare por edhe si një qendër e rëndësishme për zhvillimin e sportit dhe turizmit në Kosovë.